सतीश डोंगरे
शिरूर : शिरूर तालुक्यातील मलठण गावच्या कन्या सौ. संगीताताई राठोड – ओसवाल यांची कोरेगाव सातारा नगरपंचायतीच्या नगरसेवकपदी बहूमताने निवड झाली आहे. त्यांच्या या यशाबद्दल त्यांच्यावर मलठण परिसरात सोशल मीडियामधून अभिनंदनाचा वर्षाव होत आहे.
मलठणच्या मुख्य बाजारपेठेत संगीताताई यांच्या वडिलांचा कपडे आणि इलेक्ट्रिकल वस्तूंचा खूप जुना व्यवसाय होता. त्यांच्या वडिलांनी अतिशय सचोटीने आणि मेहनतीने हा व्यवसाय संपूर्ण शिरूर तालुक्यासह पुणे जिल्हयात नावारूपाला आणला होता. मलठणच्या सामाजिक धार्मिक जडणघडणीत या कुटुंबाचा खूप मोठा वाटा होता. लग्न झाल्यानंतरही संगीताताईंनी राजकारणाच्या माध्यमातून हीच परंपरा सासरी पुढे चालू ठेवली आहे. राठोड परिवारातील कन्येची कोरेगाव नगरपंचायतीच्या नगरसेवकपदी निवड झाल्याची बातमी मलठणमध्ये समजताच मलठणच्या ग्रामस्थांनी आनंद व्यक्त केला तर अनेक ज्येष्ठ नागरिकांनी राठोड यांच्या आठवणींना उजाळा दिला.
सातारा- कोरेगाव नगरपंचायतीसाठी 21 डिसेंबरला 13 प्रभागांसाठी तर 18 जानेवारीला चार प्रभागांसाठी दोन टप्प्यात मतदान झाले होते. संपूर्ण सातारा जिल्ह्यात व्होल्टेज निवडणूक म्हणून ओळखल्या जाणाऱ्या कोरेगाव नगरपंचायत निवडणुकीत आमदार महेश शिंदे यांच्या नेतृत्वाखालील कोरेगाव शहर विकास परिवर्तन पॅनलने तेरा जागांवर विजय मिळवत परिवर्तन करून एक हाती सत्ता मिळविली.
मलठणच्या कन्या सौ. संगीता राठोड – ओसवाल ह्या याच पॅनलमधून निवडणूक लढत होत्या. अतिशय प्रतिष्ठेच्या केलेल्या वॉर्ड क्रमांक 13 मधून त्या 322 मतांनी विजयी झाल्या आहेत. संगीताताई ह्या उच्चशिक्षित असून मात्र राजकारणात नवख्या असूनही समोरच्या उमेदवाराला धूळ चारल्यामुळे त्या विशेष चर्चेत आल्या आहेत. त्यांचे पती नितीन ओसवाल यांच्यासह त्यांच्या संपूर्ण कुटुंबाने त्यांच्या विजयासाठी मोठी मेहनत घेतली.
from https://ift.tt/33VlY1X